mysteriouseve: نحنا... أو شي بيشبهنا

أنا ويّاك سهرانين بهل الليل. إنت عم تحط آخر لمسات عمقالك، وأنا عم ترجم آخر صفحة قبل ما نام. متل العادة بتدقلي. ومتل العادة، بعرف إنّو إنت، من دون حتّى ما شوف النّمرة.
- إيف، وحياتك خلصيني...
- هات تنشوف، مين منغصلك عيشتك هالمرة، المضاف إليه أو المفعول به؟
- الحقيني بالعدد: 14 قتيل و25 جريح.

للمرة العشرين، بذكرك بالقاعدة النّحوية، وللمرة العشرين بتنساها. بتضلك تقلي: إذا أنا موجودة لشو تحفظها؟ بتفضّل تتذكرني، تحكيني، على إنو تتذكر القاعدة النّاشفة. كلامك بيكون بايخ ساعتها، بس بتضحّكني. بتقرالي المقال قبل ما تبعته عالجريدة، وبتسألني عن شوية تفاصيل. بحب إنّو ما بتنام قبل ما تسمع رأيي بيلي كتبته، وأنا أصلاً ما بقصّر فيك. بحب إنّو بقدر جادلك بمشاكل الكتابة يلي بتجمعنا، من دون ما تتطلّع فيّ متل شي هبلة. بحبّ لما تحكيلي عن مشاكلك مع سحر، وتسألني السّؤال يلي ما بيتغيّر: قولِك بعدها بتحبني؟ "إيه، إيه، بتحبّك، بتحبّك يا مسطول!"

بتقول عنّي لئيمة كتير، وكتير مرات، بتضرب على راسك وبتصرخ: "إنتِ، الله يساعد اللي بدو ياخدك!". بس بترجع بتدق عبابي، وبتسألني: "بتساعديني اشتري البدلة الجديدة؟ إذا تركتيني لحالي، بوقع ضحيّة استعمار السّوق عالمستهلك التَّعبان يلي متلي، ويمكن اشتري قميص زهر، أو كرافات خضرا بنقط أورونج!" بيخطر عبالي شوي مشهد سحر والرجّال اللي لابس كرافات خضرا بنقط أورونج، وبقول حرام أعمل هيك برفيقة. بقبل؛ بتنبسط إنت، وبتاخدني بالآخر لناكل بوظة من عند أبو ليلى.

ما بعرف قدّيش صارلنا أصحاب. يمكن من قبل ما يبلّش الزمن. جرّبنا نحب بعضنا هيداك الحبّ، بس ما ظبطت معنا. بتعرف؟ منيح يلي ما ظبطت معنا. منيح يلي ما كرهنا بعضنا. وإلا لمين كان بدي إشكي همّي كل ما كسرولي قلبي؟ وقدام مين كان بدي جن وفش خلقي، وهو يتحملني بكل حالاتي؟ قلّي. مين يلي كان بدّي حِبّه متل شي إم بتخاف عولادها، وهو يحضني متل إخت صغيرة، بلا أحكام سابقة وكليشيهات، بلا ما نظرات العالم تحكي علينا، بلا ما الحب يتحوّل لحقد متل عشاق هالإيّام...

بكرة عرسك. من بكرة، هتبطّل تدقلّي بالليل، وأنا حصير ترجم لوحدي. إشيا كتير رح تتغيّر، على طول. اليوم، نزلت عالسّوق. ما كنت عارفة شو بدّي جبلك هديّة. كان بدّي شي غير عن كلّ العالم، لا مكواية، ولا غسالة، ولا ما بعرف شو كمان... بالآخر، جبتلك لوحة لرسّام إنت بتحبّو. فيها شمس، وفيها ولاد عم يلعبوا عالبحر... بكرة رح نرقص. بكرة رح نخوَت ونجنّ. رح تلبس البدلة اللي نقّيناها. رح نتصوّر، ونقوم عالدّبكة، وتقرصني العروس. وبعدين... بعدين، بيضل في صورة، معلّقة عشي حيط، لولاد عم يلعبوا عالبحر.