عندي مشكلة مع الكتابة. عادةً، بكتب حتّى فش خلقي. بقول لحالي: أحسن فشه هون حتى ما فشه بحدن تاني. أصلاً يلي بيني وبين الورقة بيضلو بيناتنا، أو عل قليلي أنا بخلص منه، وتصطفل هي فيه. أوقات، برجع بقرأ شو قلتلها. عن جد، حرام هي! شو بتتحمّل مني وجع وقرف وتشاؤم. بضحك، لأنو أنا بيني وبين حالي أكتر مخلوقة متفائلة بهل دني. دايماً بحاول شوف النّص المليان من الكباية، حتّى لو ما كان فيها ولا نقطة مي. على كل حال، متل ما قلت، أحسن كون سوداويّة هون، بِقَلْب هل كواليس المخباية، على إنو إقلب مسرح حياتي فوقاني تحتاني، أو "رأساً على عقب" متل ما بيقولو. صحيح إنّو أوقات بنسى إرسم ضحكة على وجّي، وإنّو كتير بيسألوني: "ليش زعلانة؟"، بس يمكن لو البسمة عوجوهم حقيقية، ما كنت نسيت.
لمّا بلش إكتب، بكون مش عارفة لوين رايحة. ولا مرّة عملت خطط أو تصاميم. ومواضيع الإنشاء بالمدرسة كنت دايماً إكتبها بالأول، وبعدين حطلها التّصميم. ما بعرف لوين بحور الكلمات بتودّيني. أصلاً، كتير أوقات برمي حالي كيف ما كان، بعمل حيّلا حركة، لأنو ما تعلّمت كيف قدّر لحظة السّكوت، ولا احترمها، ولا حتى حبّها... بس العذاب يلي ما بقدر إتحمله أبداً: إنو إرجع إقرأ حالي، لأنو دايماً بحس إني عم خيّب توقعاتي، إنو خربشاتي سخيفة، وإنو خلصنا بقى! اسكتي يا بنت...
عشان هيك، كتير أوقات كنت طلّق الورقة والقلم، و"بالتلاتة" كمان، وكتير أوقات كنت إرجعلهن مشتاقة. يمكن عشان هيك كمان، فضّلت كون مترجمة: حتى عيد تشكيلة الأفكار على طريقتي، شوف حالي بكل الكتابات، ووصّلها بقلمي، وامتلكها بقلمي، عبّر قديش بتعنيلي وقدّيش لمستني بقلمي كمان. صحيح إنو لازم كون أمينة للكاتب يلي عم ترجمله، بس النّص المترجَم عطول بينبض بقلبين، وبيتنفس بروحين، وما معقول تلاقي غير هيك. مني كاتبة ناقصة، متل ما كتير ناس بيوصفوا المترجم، وعن غبا كمان (دغري بيسألوك: كم لغة بتعرف؟ يييي، بس تلاتة؟ ما كل العالم بتعرف انكليزي -كأنو يلي بيعرف لغة صار يعرف يترجمها- وبعدين بيسألوك: شو بترجم هل كلمة؟ كإنو أنت مفروض تكون قاموس متجوّل، وكأنو ما بيعرفو إنو الكلمة بلا سياقها متل شجرة الخريف بلا وراقها: عارية، وما حدا بيعرف شجرة شو عن جد هي!).. كنت عم قول مني كاتبة ناقصة، بس يمكن كون البطلة الثّانوية يلي بتشتغل من قلبها، وبالآخر التّهليل كلو بيروح لغيرها. أصلاً، مش عم بحكي عن حالي، كل المترجمين هيك.
عم بلش استطرد كتير. على كل حال، حكيت كتير اليوم. يلا أنا رايحة. على فكرة، ينعاد عل جميع.
|
You have a very beautiful Site..
:)