شو بدّي قلِّك... وأصلاً هالشوية حكي، عشو بينفعوا؟
وبعدين ضروري قلّك؟ طب ما إنت بتعرفي كلّ شي. بتعرفي البير وغطاه. بتعرفيني كيف أوقات بتلبّك قدّامك. ولمّا تسأليني إذا بحبِّك، بْعصّب، وبقلّك: "إنّو شو قولك يعني؟"
بتعرفي...
هالعالم لو بدونك أنا ما كنت بعيشه. هيك، بكل بساطة بقلّك ياها، بلا مقدّمات ولا حروف ضايعة بدون نقط. حاجة تْجَربي تْفَهْميني إنّك بشي يوم، رح تروحي. حاجة تقوليلي إنّك مش حتبقي حدّي عطول. عم قلّك، إذا رحتِ، أنا بموت! صدقيني، بِدْبل و... بموت.
بدّي خلّيكِ مبسوطة عطول، بدّي إحميك من كلّ الوحوش. ويلي بيفكّر يإذيكِ، أنا باكله باسناني! بتضايق، لأنّي بحس حالي ضعيفة، وما بعرف حتّى كيف ضَحْكِك. لمّا شوف الدّمعة بعيونك، برجع بنت صغيرة، وبحس الدّنيا كلها عم تنهار حواليّ. ولمّا تحكيلي عاللي بيزعلك، بسمعلك وبعمل حالي قويّة... بس من جوّة، نار عم تحرقني. وإذا شي مرّة كنتِ تعيسة، بحسّ سعادتي ذنب كبير. بحس حالي، أنا إمّك، وأنا يلي عم بحميكي.
أوقات بفيق بالليل، خيفانة. بفوت على أوضتك، بس عشان إسمع نَفَسك. عشان إرتاح. الفكرة لحالها بتخليني إبكي، وبضلني سهرانة. بصير بعمل مفاوضات مع ربّي. بقلّه يا الله، أنا مش هيّ. "بليز" مش هي. بعرف إنّو فيه كتير ناس ظلموك ووقفوا بوجّك. بصير بكره النّاس. بقلّك إنّن آخر همّي. بس إنت عطول منيحة مع الكل. بتضايق أكتر. لأنّك بتقدري الكل، وما حدا عارف قيمتك.
أنا منّي قويّة يا إمّي. قدّامك، أنا ما شي. شقفة ورقة خريف، بعدها عم بتقاوم العواصف، لأنّها مش ناوية تترك الشّجرة. وإذا طيّرني الهوا شي مرّة، بْدور من شجرة لشجرة، وببقى كل حياتي عم فتّش عليك. وما لاقيك.
يا إمّي، أنا، عشوي، كنت عبدتك... |
... wow!
Your mum is lucky to have a daughter who loves her so truthfully and completely!
I can only imagine how you would love your kids...