mysteriouseve: الجسور المجروحة

الزّهراني... الأوّلي... الدّامور...

كانت الطّريق من الجنوب عبيروت طويلة. هيدا من زماااااان... وكنّا، كل مرّة، نضيّع الوقت نحنا وعم نعدّ الجسور... ما كنّا نفهم كيف بيحسبوا المسافة بالوقت أو بالكيلومترات. كنّا زغار ونعرف نحسبها بالجسور، بس.
- بابا، كم جسر صاروا؟
- ماما، كم جسر بعد حتّى نوصل؟

كم جسر في بين الجنوب وبيروت؟ ما بعرف... ما تسألوني... نسيت... من زمان بطّلت الجسور هي عملتي النّقدية، ومقياسي للأشيا. صارت ضحيّة متلها متل غيرها، منركض لنقرا اسمها عملاحق الأخبار، بكعب الشاشة، مع كلمة "عاجل" باللون الأحمر.
ليش مين قال الجسر ما بينزف بالأحمر لمّا يتوجّع؟

من الجهة التانية للجسر، مطرح ما صار صعبة أوصل، في كل المشاهد اللي كأنّها عم بتعيد حالها، قبل عشر سنين. بس أنا وقتها كنت من الجهة التّانية للجسر. هلّق صرت هون. "ميم" بقيت هونيك. بفكّر إنّو يا ريتني معهم هونيك، متل هيديك الإيّام. بس ما بدّي تلفن لها هلّق. رح نرجع نختلف بخصوص الحقّ مع مين وعمين، وقصّة الأسرى المتروكين، والجيش اللي مش قادر يحمي، و"هديّة" الحزب كلّ سنة، ورح ترجع تتطلّع فيّ كأنّو بيروت غيّرتني. ما بعرف... أنا أصلاً كتير ضايعة. معصّبني اللي صار، مضايقني، وكتير ضايعة.

تلفون من الشّغل ببلّغني إنّو "ما تتركي بيتك الليلة". بففففف، شي بيضحّك. أصلاً هول الأجانب بخافوا من نملة. "طيّب، رح انتبه" وبتّصل بأوّل رقم بفكّر فيه: "شو عامل الليلة؟"... بتذكّر ساشا الرّوسي، وبتحسّر على كلّ تعبي كرمال يزور لبنان. رح يرجع يطلعلي بهيدي النظرية الغبية "شفتي؟ قلتلك إنّو بخاف إجي". أوّل مرّة سمعت جملة من هالنّوع، ضحكت كتير. صراحة؟ لهلّق بلاقي صعوبة إنّو ما إضحك. "بتخاف؟ ليه شو في؟" نحنا من جوّة ما منعرف شو في. ما منعرف كيف حياتنا عم تمرق فينا وعلينا. قصّة كفاح يوميّ؟ ضدّ شو بالظّبط؟ ضدّ اللي بخافوا يجوا، أو اللي بخافوا يضلوا، أو اللي بخافوا يجوا وما يضلّوا، أو اللي بخافوا وبس؟

أسامي الجسور بالملاحق الإخباريّة كلّها أصحابي. صُحبة من نحنا وزغار. وبكرة رح شوف صورها بالجريدة، قبل وجعها وبعده، مع سطر زغير عم بقلي: "فتشي عالفوارق السّبعة".

خايفة لاقي أكتر من سبعة. أكتر بكتير.