لأ مش هي إمّك
أنا اللي هي
أنا اللي حضنتك
وخبّرتك ألف خبريّة
أنا اللي علّمتك تقرا
وخيّطت ازرارك بإيديّ
أنا اللي قلتلي بحبِّك
وعشوي... عطيتك عينيّ
أنا اللي رسمتني عَ اوراقك
وهْديتني بطاقات.. وورد.. وغنيّة
أنا اللي قلت إنّك ابني، وطالعلي
بمنخاري وطبعي وسَهَري ليليّ
أنا اللي خبّرتك إنّو الحبّ بيعلّم الشّعر
وإنّو الإنسان لمّا يحبّ بيصير عنده قضيّة
أنا اللي بعرسك قمت ودَبَكت
يا حسرتي... بتعرف إمّك شو مستحية
أنا اللي ما بحقّ لي أفرض عليك حالي
لا ببيتك، ولا بحياتك، ولا حتّى عالهويّة...
وجايي بعد كل هالعمر تقلّي هي؟
لا يا ابني... إذا أنا مش إمّك...
أكيد مش هي!
|
أكيد إنّو الأم مش بس اللي خلّفت
وإنما اللي أعطت منها شي لأبنها وضحّت وسهرت
الأم مش رحم منعيش فيه حياتنا الأولى بس...الأم إحساس و معنى ووأحلى كلمة وأدفأ حضن...الأم هيِّ إيد عطول حدنا لتدلنا وتحمينا...
بوست حلو يا إيف...بيشبهك